Það skiptir gríðarlega miklu máli að vera með framúrskarandi fasteignasala þegar þú ert að selja húsið þitt. Ástæðurnar fyrir því eru að þú vilt að húsið þitt seljist hratt og örugglega, á góðu verði og ef það kemur eitthvað upp á þá viltu að fasteignasalinn sé með metnaðinn og reynsluna til að takast á við vandamálið.
Hér eru 4 atriði sem einkenna frábæran fasteignasala:
1. Þekkir markaðinn
Fasteignasali sem þekkir markaðinn vel veit hvað hann á að verðmeta húsið þitt á mikið og er með sjálfstraust til að selja það. Ef það sést eða heyrist á fasteignasalanum að hann sé óöruggur, þá taka kaupendur eftir því og vilja síður gera tilboð í húsið. Þess vegna er gott að spurja fasteignasalann einhverjar spurningar út í markaðinn til að sjá hvernig hann svarar.
2. Kann að markaðssetja og selja eignir
Framúrskarandi fasteignasali veit að það þarf að taka flottar ljósmyndir af eigninni til að auka líkurnar á að fólk fái áhuga á henni og vilji koma að skoða. Hann þarf einnig að geta selt eignina þína og talað um kostina sem þín eign hefur upp á að bjóða. Þess vegna væri gott að fá fasteignasalann til að kynna þína eign fyrir þér eða spurja hann hvað hann ætli að tala um í opnu húsi.
3. Veitir framúrskarandi þjónustu
Er fasteignasalinn fljótur að svara eða þarftu að ganga á eftir honum? Það verður að taka tillit til þess að fasteignasalinn er kannski með önnur hús til að selja og getur ekki verið að svara þér á öllum tímum sólarhringsins, en hann ætti að vera nokkuð fljótur að svara og ef þú hringir, hringir hann þá til baka?
Er hann að leiða þig í gegnum ferlið á öruggan hátt eða er þetta allt í lausu lofti hjá honum? Það er mjög stór plús ef fasteignasalinn er með ferla sem hann fer í gegnum þegar hann selur eign.
4. Er fasteignasalinn jákvæður og hress?
Hvernig svarar fasteignasalinn í símann? Er hann jákvæður og hress eða hljómar hann neikvæður og niðurdrepandi? Það getur skipt miklu máli við sölu á þinni eign að fasteignasalinn sé með jákvætt viðhorf og það skíni af honum hressleikinn.
Auglýsing
Auglýsing
Höfundur
