Merki eru um að meira jafnvægi sé að komast á fasteignamarkaðinn. Það hafa fleiri íbúðir verið teknar úr sölu síðustu þrjá mánuði en síðasta ár þar á undan. 623 íbúðir voru teknar úr sölu í nóvember á móti 617 í október af vefnum fasteignir.is á höfuðborgarsvæðinu, sem er lítils háttar fjölgun. Þetta kemur fram í mánaðarskýrslu HMS.
Nýjar íbúðir í dag minni en áður
“Söluverð á fermetra á nýjum íbúðum á höfuðborgarsvæðinu var 801 þús. kr. í október. Á höfuðborgarsvæðinu hefur munur milli fermetraverðs nýrra íbúða og annarra íbúða aukist undanfarin þrjú ár á sama tíma og meðalstærð nýrra íbúða hefur minnkað. Svipaða sögu er að segja af þróun fermetraverðs í nágrenni höfuðborgarsvæðisins,” segir í skýrslunni
Litlar íbúðir seljast hraðar
Sölutími lítilla íbúða (0-2 herbergi) hefur styst samfellt frá apríl á þessu ári og er nú 35 dagar. Sölutími þriggja herberga íbúða er 45 dagar og sölutími íbúða með fleiri en fjórum herbergjum er 55 dagar og er sölutími þeirra nú álíka og var fyrir vaxtalækkunarferli Seðlabankans 2020.
Mikil fjölgun gjaldþrota í byggingariðnaði
“Í október urðu 34 fyrirtæki í byggingarstarfsemi og mannvirkjagerð gjaldþrota og var þetta fjórði mánuðurinn á árinu sem gjaldþrotin voru fleiri en 30. Fyrir þetta ár og frá 2012 hafði fjöldi þeirra einungis einu sinni farið yfir 30 í sama mánuðinum. Til þessa á árinu hafa 240 fyrirtæki orðið gjaldþrota í byggingarstarfsemi og mannvirkjagerð en alls voru gjaldþrotin 86 á öllu árinu 2022. Þó hefur hægst á gjaldþrotum fyrirtækja í byggingarstarfsemi og mannvirkjagerð en á fyrri hluta þessa árs voru samtals 186 fyrirtæki gjaldþrota,” segir í skýrslunni.
Auglýsing
Auglýsing
Höfundur
